सोलापूर : सोलापूर जिल्ह्यातील रोपळे (ता. पंढरपूर) येथील रयत शिक्षण संस्थेच्या शिवाजीभाऊ बाबा पाटील विद्यालयात गुरुकुल प्रकल्पांतर्गत आकाशकंदील बनवण्याची कार्यशाळा घेण्यात आली. आकाशकंदील कसा बनवावा आणि तो कसा सजवावा याची प्रात्यक्षिके विद्यार्थी-विद्यार्थिनींना दाखवून ते करण्याचा प्रत्यक्ष अनुभव त्यांना देण्यात आला. विद्यार्थ्यांनी बनवलेल्या आकाशकंदिलांचे विद्यालयात प्रदर्शनही भरवण्यात आले होते.
पाटील विद्यालयाचे मुख्याध्यापक बिभीषण पाटील व पर्यवेक्षक चंद्रकांत पाटील यांच्या मार्गदर्शनाखाली विविध उपक्रम राबवले जात आहेत. त्याअंतर्गत यंदा आकाशकंदील बनविण्याची कार्यशाळा घेण्यात आली. ग्रामीण भागातील मुलांनी आपल्या घरचा आकाशकंदील आपणच बनवला पाहिजे आणि आकाशकंदील आकर्षक बनवून त्याची विक्रीही करता आली पाहिजे, असा दुहेरी उद्देश ठेवून ही कार्यशाळा घेण्यात आली.
दोन-तीन दिवस उत्तम पद्धतीने सराव करून घेतल्यामुळे शाळेतील विद्यार्थी-विद्यार्थिनी आता आकर्षक आकाशकंदील बनवायला शिकले आहेत. दिवाळीच्या पार्श्वभूमीवर ग्रामीण भागातील मुलांना या कलेच्या माध्यमातून चार पैसेही मिळतील, अशी आशा शिक्षकांना आहे. कलाशिक्षक कल्लेश्वर पानसांडे यांनी विद्यार्थी व विद्यार्थिनींना विविध प्रकारचे आकाशकंदील बनवायला शिकवले. त्याची प्रात्यक्षिकेही दाखवली.